3 лістапада ў выставачнай зале Віцебскага цэнтра сучаснага мастацтва адкрылася выстава «Аляксандр Карпан (1953-2016). Adagio. Акварэль», прымеркаваная да 70 - годдзя з дня нараджэння мастака. З 1979 па 2014 гады Аляксандр Карпан выкладаў малюнак, жывапіс і кампазіцыю на мастацка-графічным факультэце Віцебскага дзяржаўнага ўніверсітэта імя П.М. Машэрава. Ён быў адным з самых паважаных педагогаў па мастацтву, сапраўдным прафесіяналам сваёй справы. За гады працы на кафедры выяўленчага мастацтва Аляксандр Карпан падрыхтаваў вялікую колькасць вучняў, многія з якіх сталі яркімі творчымі індывідуальнасцямі і сёння вядомыя не толькі ў Беларусі, але і за яе межамі.

Ада́жыа (Adagio)... Для Аляксандра Карпана гэта была не толькі адна з самых любімых мелодый у выкананні Лары Фабіан, але, напэўна, тэмпаральнасць усяго яго жыцця і творчасці. У павольным, спакойным рытме мастак больш за ўсё цаніў гармонію і стрыманасць, а ў выяўленчым мастацтве і музыцы вельмі трапяткова адносіўся да характара інтанацыі і меладычнага малюнка. Музыка была арганічнай часткай творчай натуры Аляксандра Карпана. Магчыма, таму кожная яго акварэль успрымаецца як музычная фраза. Як маленькае «adagio». Без перабольшвання А. Карпана можна было б назваць выдатным меладыстам у шырокім сэнсе гэтага слова. Не пазбаўленыя сентыментальнасці і пачуцёвасці, пяшчотнасці і лірызма акварэлі мастака ўражваюць высокім прафесіяналізмам, паліфанічнымі пластычнымі варыяцыямі, шырокім дыяпазонам мадуляцый колеру і ў цэлым – нейкай патаемнай меладычнай энергіяй.

Пры ўсёй сур’ёзнасці стаўлення да мастацтва Аляксандр Карпан пісаў свае акварэлі неяк надзвычай лёгка. Здавалася, што неўтаймаваная стыхія адной з найбольш складаных тэхнік жывапісу была для яго зразумелай і цалкам падуладнай. Аднолькава таленавіта А. Карпан працаваў у розных жанрах, хоць і аддаваў перавагу нацюрморту, пейзажу і партрэту.

Пачынаючы з 1979 года Аляксандр Карпан з'яўляўся актыўным удзельнікам абласных, рэспубліканскіх, усесаюзных і міжнародных выстаў, міжнародных і рэспубліканскіх пленэраў. За апошнія два дзесяцігоддзі А. Карпан атрымаў прызнанне і найвышэйшыя адзнакі прафесіяналаў і гледачоў на буйных міжнародных акварэльных біенале ў Каўнасе (Літва), Шэньжэне (КНР), Санкт-Пецярбургу і Петразаводску (Расія), Віцебску і Полацку (Беларусь). Мастак неаднаразова праводзіў майстар-класы ў Віцебску, Мінску, у Арт-цэнтры імя Марка Ротка (г. Даўгаўпілс, Латвія), у анлайн-прасторы.

Творы Аляксандра Карпана захоўваюцца ў зборах Нацыянальнага мастацкага музея Рэспублікі Беларусь, Полацкага гісторыка - архітэктурнага музея-запаведніка, Мастацкага музея г. Віцебска, аддзела культуры г. Нінбурга (Германія), аддзела культуры г. Вецлара (Германія), Саюза мастакоў г. Брэмена (Германія), Таварыства беларуска-нямецкага сяброўства г. Куксхафэна (Германія), а таксама ў прыватных калекцыях у Аўстрыі, Англіі, Беларусі, Бельгіі, Германіі, Грэцыі, ЗША, Ізраілі, Італіі, Ірландыі, Канадзе, Кітаі, Латвіі, Польшчы, Расіі, Украіне, Францыі, Чэхіі і Эстоніі.

Міхась Цыбульскі, кандыдат мастацтвазнаўства, куратар выставы.