13 верасня ў Віцебскай абласной біблиятэцы адбылося адкрыццё персанальнай выставы дацэнта кафедры выяўленчага мастацтва М.Л.Цыбульскага. Выстава прысвечана яго маці - Цыбульскай Марыі Іпацьеўне -Заслужанаму работніку культуры Рэспублікі Беларусь, загадчыку бібліятэкі абутковай фабрыкі “Чырвоны Кастрычннік” (1955-1986) і ўсім бібліятэчным супрацоўнікам, самаддана працуючым на гэтай ніве. Выстава мае назву “Святочныя інтэнцыі ў жывапісных экзэрсісах”. Славесная эквілібрыстыка ў назве гэтай выставы не проста філасофская заумь і самаіронія практыкуючага ў жывапісе мастацтвазнаўцы, але перш за ўсё жаданне падкрэсліць статуснасць гэтай экспазіцыі, ўзнёслы настрой і асаблівую ступень павагі да інстытуцыі пад велічнай назвай БІБЛЯТЭКА. У намерах (intentio) аўтара, прадстаўленых у экспазіцыі нацюрмортаў, безумоўна, перш за ўсё жаданне павіншаваць бібліятэчных супрацоўнікаў з іх прафесійным святам, звярнуць увагу на ДУХ МЕСЦА а таксама імкненне, нагадаць ў прасторы гэтага сапраўднага ХРАМА КНІГІ аб выключнай ролі як інтэлекта так і эмацыянальных перажыванняў ва ўспрыняцці Боскай прыгажосці свету.
На выставе прадстаўлены творы, напісаныя ў розны час, амаль на працягу трыццаці гадоў. Большасць з уключаных у экспазіцыю нацюрмортаў іх аўтарам пісаліся выключна як класічныя экзэрсісы (exercice) — практыкаванні па ўдаканальванню тэхнікі, па спасціжэнню пластычных асаблівасцяў формы і колеру, і раней амаль што ніколі не выстаўляліся. Некаторыя з гэтых нацюрмортаў пачыналіся як эцюды, своеасаблівыя ўрокі па “разагрэву” творчай свядомасці. А потым, на жаль (ці на шчасце?) так і засталіся ўсяго толькі сведкамі тых ці іншых разважанняў, тэмпаральнасці часу, захавальнікамі пэўнага настрою.