22 лютага адразу ў некалькіх залах Віцебскага мастацкага музея адкрылася вялікая выстава латвійскай графікі «Лісты з Латвіі». У экспазіцыі больш 70 твораў, якія прадставілі 25 мастакоў, што ўваходзяць у аб’яднанне «Grafikas kamera (Камера графікі)». Куратарам выставы з латвійскага боку выступіла вядомы графік, Ілзэ Лібіетэ, якая доўгі час узначальвала гэта аб’яднанне.

Аб’яднанне «Камера графікі» было створана ў 1994 годзе пасля ліквідацыі Латвійскага мастацкага фонду, які доўгія гады кіраваў і клапаціўся пра майстэрні гравюры. Мэтамі аб’яднання сталі папулярызацыя графічнага мастацтва, забяспечэнне даступнасці літаграфічнай тэхнікі для сяброў Саюза мастакоў Латвіі і іншых зацікаўленых асоб, ажыццяўленне мастацкай адукацыі ў галіне друкарскіх тэхнік для для студэнтаў Акадэміі мастацтваў, Даўгаўпілскага ўніверсітэта, студэнтаў Рыжскай мастацкай школы імя Я.Разэнталя, а таксама іншых мастацкіх школ, арганізацыя творчых майстэрняў, летніх сесій, канферэнцый па праблемах развіцця графікі, выстаў графічных твораў ў Латвіі і іншых краінах свету. І, канешне ж, клопатам аб’яднання стала захоўванне вялікай калекцыі графічных твораў і яе папаўненне работамі сучасных мастакоў.

На віцебскай выставе можна азнаёміцца з работамі латвійскіх мастакоў некалькіх пакаленняў, якія рэгулярна прадстаўляюць сваю краіну на міжнародных фэстах і з'яўляюцца лаўрэатамі прэстыжных біенале і трыенале графікі. Сярод іх Андрыс Абілеўс, Ілгнэсэ Авоціня, Аляксандр Бочэ, Ансіс Бутнарс, Інара Гарклава, Відага Грынберга, Мая Драгунэ, Алена Кажэўнікава, Сяргей Калецэнка, Марутэ Клуша, Інгуна Кроле-Ірбэ, Гунарс Кроліс, Агнеса Курземніэцэ, Ілзэ Лібіетэ, Паўліс Ліепа, Інэсэ Ліецкалніня, Іева Нагліня, Аніта Нікульцава, Ганна Орніня, Вілніс Путрамс, Ласма Пуятэ-Стурэ, Катэ Сержанэ, Дарта Хофманэ, Олафс Шавеліс, Ларыса Шэлар. Творы асноўнай большасці ўдзельнікаў экспазіцыі ёсць у шматлікіх сусветна вядомых музеях.

Міхась Цыбульскі, кандыдат мастацтвазнаўства, сакуратар выставы