25 кастрычніка ў выставачнай зале мастацка-графічнага факультэта ў межах “Дзён мастацтва і культуры Латвіі ў Віцебску адкрылася мастацкая выстава “Тэкстыль / Пралог”.

У адкрыцці выставы прымалі ўдзел Глава Консульства Латвійскай Рэспублікі ў Віцебску   Угіс Скуя, прарэктар нашага ўніверсітэта  Валянціна Багатырова, куратары выставы – загадчык кафедры тэкстылю Латвійскай акадэміі мастацтваў Іева Круменя і дацэнт кафедры мастацтваў ВДУ імя П.Машэрава Міхась Цыбульскі, загадчыкі кафедраў мастацка-графічнага факультэта.  ”Традыцыйна так склалася,  - адзначае Іева Круменя, - што габелен – гэта першая тэхніка, якую асвойваюць студэнты першага курса. Пазбягаючы занадта вучнёўскіх і наіўных узораў тэхнікі ткацтва, студэнты шмат часу эксперыментуюць са структурамі тканіны, характарам, формай і колерам матэрыялаў. Усе прадстаўленыя на выставе творы - гэта працы, створаныя першакурснікамі, і амаль для ўсіх з іх гэта першы габелен у жыцці, таму што рэдка хто прыходзіць з наяўнымі навыкамі ткацтва.”     

Акрамя выставы на працягу трох дзён  прафесарам Іевай Круменя былі прачытаны лекцыі для выкладчыкаў і студэнтаў мастацка-графічнага факультэта. Іева Круменя у сваіх прамовах закранула як асноўныя тэндэнцыі развіцця тэкстыльнага мастацтва Латвіі,  так і некаторыя асаблівасці шэрагу аўтарскіх тэкстыльных тэхнік і тэхналогій.

М.Л.Цыбульскі, куратар праекта