17-га верасня, у Дзень народнага адзінства, калектыў Віцебскага дзяржаўнага ўніверсітэта імя П.М. Машэрава прыняў актыўны ўдзел у напісанні Рэспубліканскага дыктанта. Гэтая маштабная рэспубліканская акцыя стала выдатнай нагодай для выкладчыкаў, супрацоўнікаў і студэнтаў універсітэта не толькі праверыць свае веды роднай мовы, але і далучыцца да агульнай гістарычнай падзеі.

Мерапрыемства праходзіла ў фармаце прамой трансляцыі. Тэкст дыктаваў вядомы беларускі блогер Андрэй Максімаў. Дыктант, які гучаў у эфіры, быў на беларускай мове і меў глыбокі і змястоўны сэнс. Ён утрымліваў каштоўную гістарычную інфармацыю пра ключавыя падзеі, якія прывялі да ўтварэння гэтага маладога, але надзвычай важнага для беларускага грамадства свята. Удзельнікі рэспубліканскай акцыі змаглі яшчэ раз асэнсаваць гістарычны шлях беларускага народа, яго імкненне да адзінства і захавання нацыянальнай ідэнтычнасці.

Ад імя кіраўніцтва ВДУ машэраўцаў павіншаваў першы прарэктар Андрэй Мехавіч. Андрэй Паўлавіч падкрэсліў, што гэта свята з’явілася ў нашым календары адносна нядаўна, толькі ў 2021 годзе. Нягледзячы на гэта, яно па сваёй гістарычнай і грамадскай значнасці стаіць побач з іншымі важнейшымі дзяржаўнымі святамі. І наша агульная задача – не толькі ведаць гісторыю ўзнікнення гэтай даты, але і берагчы, перадаваць наступным пакаленням яе галоўны матыў: адзінства, павага да нашай агульнай спадчыны і клопат пра будучыню роднай зямлі.

Больш фотаздымкаў – у групе «Медыяцэнтр ВДУ»

©Аддзел медыякамунікацый «Медыяцэнтр ВДУ»