6 лістапада у Цэнтры славянскіх моў і культур пры філалагічным факультэце прайшла ўрачыстая імпрэза з нагоды стагоддзя незалежнасці Польшчы. На мерапрыемстве прысутнічаў дэкан філалагічнага факультэта прафесар С. У. Нікалаенка, выкладчыкі і студэнты, якія вывучаюць польскую мову.

Адкрыў імпрэзу прывітальным словам кіраўнік цэнтра дацэнт Ю. М. Бабіч. Затым з лекцыяй пра гісторыю польскай дзяржавы, пра барацьбу палякаў за незалежнасць выступіў загадчык кафедры гісторыі Беларусі нашага ўніверсітэта дацэнт А. М. Дулаў. Прысутныя з вялікай цікавасцю слухалі навукоўца, задавалі пытанні, выказвалі свае меркаванні.

Другая частка мерапрыемства атрымалася творчай і цалкам праходзіла на польскай мове. Студэнты чыталі вершы польскіх паэтаў, распавядалі пра знакамітыя мясціны суседняй нам краіны, паказалі шматлікім прысутным мініяцюры, сцэнкі са студэнцкага жыцця, спявалі песні пад гітару. І яшчэ раз падкрэслім, што ўсё гэта адбывалася на польскай мове! Такім чынам моладзь прадэманстравала сваё добрае веданне блізкароднаснай славянскай мовы і тым самым заахвоціла многіх да яе вывучэння.

У хуткім часе ў Цэнтры славянскіх моў і культур адбудзецца чарговая імпрэза, тым разам прысвечаная юбілею вялікага польскага пісьменніка, этнічнага ліцвіна Адама Міцкевіча. Сардэчна запрашаем!