Да 60-годдзя з дня нараджэння Сяргея Кухто (1959-1999) ў віцебскім мастацкім музеі адкрылася персанальная выстава яго твораў. У экспазіцыю ўвайшлі кампазіцыі са збору сям’і мастака, некалькіх прыватных калекцый а таксама творы, якія з’яўляюцца ўласнасцю віцебскага мастацкага музея.
Жыццё і творчы лёс Сяргея Кухто змяшчаюцца ў некалькіх радках біяграфіі: нарадзіўся 22.4.1959 года ў Віцебску, у 1978 годзе скончыў Мінскую мастацкую вучэльню імя А. Глебава, дзе вучыўся ў М.Ф. Пракапенкі, К.Ф. Шастоўскага, А.А. Малішэўскага. Нягледзячы на тое, што з сярэдзіны 1990-х гадоў шмат творча працаваў, ў выставах удзельнічаў не часта. А 1.11.1999 Сяргея Кухто ўжо не стала...
Сяргей Кухто быў яскравым прадстаўніком набраўшага сілу напрыканцы ХХ стагоддзя ў сусветным, у тым ліку і беларускім мастацтве, пастмадэрнізму з яго спецыфічнай з’явай нэаміфалагізмам і асаблівай цікавасцю да стылістыкі гіперрэалізму.
Цэнтральным вобразам у творчасці мастака з’яўляецца кентаўр. Архетып кентаўра, які складаўся на працягу многіх стагоддзяў, мастак нібы то прымяраў на сябе, адчуваў блізасць і падабенства з гэтым персанажам. Здаецца ў асобе кентаўра Сяргея Кухто асабліва прыцягвала дзіўнае спалучэнне звярынай натуры, магутнай сілы і накіроўваючай яе волі... Мастак «перасяліў» свайго кентаўра з гор і лясных гушчароў грэчаскай Фесаліі, на віцебскую зямлю. Адзінота кентаўра відавочная і, разам з тым, нярэдка побач з ім вобраз яго спадарожніцы.
Пераважная большасць жывапісных кампазіцый створана С. Кухто ў перыяд 1992-1999 гг. У кожнай працы мастак адштурхоўваўся ад натуры, шукаў патрэбны прататып. Зноў і зноў вяртаўся да сваіх палотнаў – нешта змяняў, папраўляў, дапісваў. Але многія палотны, на думку самога мастака, так і засталіся няскончанымі... Адметная рыса кампазіцый Сяргея Кухто – асаблівая ўвага да дэталяў, касцюмаў персанажаў, карпатлівая праца над асобнымі элементамі карціны. Здаецца ў творах няма нічога выпадковага – ўсё сур’ёзна прадумана і адточана з высокапрафесійнай адказнасцю.
Міхась Цыбульскі, кандыдат мастацтвазнаўства,
дацэнт кафедры выяўленчага мастацтва,
куратар выставы