21 лютага студэнты філалагічнага факультэта ВДУ імя П.М. Машэрава сустрэліся з загадчыкам Народнага комплекснага музея Заронаўскага краю Людмілай Нікіцінай. Яна разам са сваімі юнымі памочнікамі пазнаёміла ўсіх прысутных з кожным куточкам Заронаўскага музея.

Па яе словах, структура гэтай установы складаецца з 8 экспазіцыйных залаў: этнаграфічнай і гістарычнай, залы настальгіі або вяртання ў СССР, калекцыйнай і міфалагічнай. У кожнай з іх знаходзіцца шмат незвычайных экспанатаў, такіх як рубінка, жучок, мухалоўка, рэтра-лялька, каска пажарнага, франтавая запальнічка, рукавіца Фёдара Махнова і шмат іншых. Дзякуючы такой колькасці цікавых рэчаў, студэнты і выкладчыкі ВДУ змаглі пайграць на незвычайных музычных інструментах, прымерыць розныя галаўныя ўборы і даведацца шмат чаго новага.

Напрыканцы сустрэчы быў паказаны фільм «Наша Заронава», у якім адлюстраваны асноўныя гістарычныя звесткі пра гэта мястэчка і перыяд станаўлення Заронаўскага музея. Таксама літаратуразнаўчаму музею нашага ўніверсітэта Людміла Канстанцінаўна падарыла кнігу «Мой любы край, маё Заронава».

Анастасія Альхімовіч, студэнтка філалагічнага факультэта