1 ліпеня адразу ў некалькіх залах Аршанскай гарадской мастацкай галерэі В.А. Грамыкі адбылося адкрыццё мастацкага праекта «ТэкСтыльная вегетацыя», які быў арганізаваны кафедрай выяўленчага мастацтва Віцебскага дзяржаўнага ўніверсітэта імя П.М. Машэрава сумесна з Віцебскай абласной арганізацыяй Беларускага саюза мастакоў. Аўтар прадстаўленых у экспазіцыі твораў – вядомая беларуская мастачка і педагог, старшыня Віцебскай абласной арганізацыі ГА «Беларускі саюз мастакоў» (з 2019) Таццяна Макляцова. Дадзены праект прадстаўляе найноўшыя формы тэкстыльнай і аб’ектнай творчасці, увасобленыя ў кампазіцыях розных гадоў.

Назва праекта «ТэкСтыльная вегетацыя» – гэта не проста мудрагелістая аўтарская метанімія, ці гульня з біялагічным па сваёй сутнасці тэрмінам. ВЕГЕТАЦЫЮ ў кантэксце эксперыментаў з тэкстылем Таццяна Макляцова ўспрымае як яркую фазу творчага цыклу, як перыяд найбольшай актыўнасці і, разам з тым, як няспынны працэс росту і развіцця. Гэта менавіта тыя жарсць і апантанасць творчасцю, што рухаюць мастачкай і спадзвігаюць яе да пошуку сучасных мастацкіх форм.

Ёсць і яшчэ адзін ракурс канцэпцыі праекта «ТэкСтыльная вегетацыя». Як вядома, уток і аснова складаюць фундамент традыцыйных форм тэкстылю. Гэта тыя базавыя велічыні з якіх, нібы то з зерня, прарастае ўся шматгранная тэкстыльная творчасць. У гэтым сэнсе ВЕГЕТАЦЫЯ паўстае як працэс развіцця відавых, стылістычных, кампазіцыйных, пластычных асаблівасцяў тэкстыльных форм, як раздвіжэнне межаў мастацтва тэкстылю, пашырэнне дыяпазону яго тэхнік і тэхналогій. У дадзеным кантэксце вегетацыя для тэкстылю гучыць метафарычна: як сапраўдны перыяд абуджэння і ажыўлення, разрастання кроны і ўмацавання каранёў, цвіцення і росту.

У раслінным свеце вегетацыйны перыяд завяршаецца пладанашэннем, з’яўленнем спелага насення. У мастацтве ж выдатным аналагам гэтаму становіцца нараджэнне неардынарных творчых канцэпцый, стварэнне арыгінальных аўтарскіх кампазіцый, якіх, дарэчы, вельмі многа ў дадзеным праекце Таццяны Макляцовай.

Творам Т. Макляцовай уласцівы эмацыянальная выразнасць, складаная структура вобразнасці, асаблівая ўвага рытмічна-пластычным характарыстыкам, фактуры мастацкай паверхні, вольная гульня з тэхнікамі і тэхналогіямі, выкарыстанне нетрадыцыйных для ткацтва матэрыялаў (будаўнічая сетка, паліэтылен, газетная папера і інш.). Яе творы захоўваюцца ў Нацыянальным мастацкім музеі Рэспублікі Беларусь (Мінск, Беларусь), Музеі сучаснага мастацтва (Мінск), дырэкцыі выстаў Мастацкага фонду Беларусі (Мінск), Віцебскім мастацкім музеі, прыватных калекцыях Беларусі, Украины, Расіі, Польшчы, Германіі.

Міхась Цыбульскі,
кандыдат мастацтвазнаўства, куратар выставы