Латвійская акадэмія мастацтваў была заснавана ў 1919 годзе, а ў 1921 годзе ў акадэміі была створана кафедра графікі.   На працягу амаль стагоддзя гэта кафедра з’яўляецца вядучай у развіцці нацыянальнай графічнай школы, спрыяе фарміраванню шэрагу пакаленняў яе славутых прадстаўнікоў – выдатных творцаў,  уносиць вялікі ўклад у развіццё новых накірункаў графікі. Менавіта дзякуючы  дзейнасці кафедры графікі акадэміі мастацтваў латвійскай графіка вылучаецца ў агульнаеўрапейскай мастацкай прасторы сваёй нацыянальнай самабытнасцю і сучасным узроўнем вобразна-пластычнага мыслення.

Сёння на кафедры графікі падрыхтоўка вядзецца па двух накірунках – “графічнае мастацтва” і “мастацтва кнігі”. Студэнты спецыялізацыі “графічнае мастацтва” ў першую чаргу сканцэнтраваны на вывучэнні графічных тэхнік і тэхналогій эстампа, сусветнай мастацкай практыкі і актуальных  тэндэнцый развіцця графікі. Пэўная колькасць часу адведзена пытанням развіцця кніжнай графікі. Вывучэнне тэорыі суправаджаецца актыўнымі эксперыментамі з рознымі графічнымі матэрыяламі і тэхнікамі друку. Студэнты засвойваюць розныя асаблівасці высокага, глыбокага, плоскага і трафарэтнага друку, сярод якіх дрэварыт (ксілаграфія), лінарыт, афорт мецацінта, аквацінта, сухая іголка, калаграфія (collagraphy), літаграфія, шаўкаграфія і інш.

Студэнты, якія спецыялізуюцца на мастацтве кнігі, таксама знаёмяцца і працуюць з рознымі відамі эстампа. Але не менш увагі надаецца  матэрыялам, якія звязаны з тыпаграфікай, дызайнам кнігі і ілюстрацыяй. Студэнты вывучаюць і аналізуюць тэорыю і практыку разнастайных відаў друкаваных матэрыялаў – кніг, каталогаў, штодзённай прэсы, рэкламы, CD, відэа і г.д. І тут развіццё творчасці студэнтаў мае першаснае значэнне. Кафедра гарантуе, што навучальны працэс уключае ў сябе мноства праектаў супрацоўніцтва з выдавецтвамі, друкарнямі і іншымі арганізацыямі.

Кіраўнік кафедры графікі – прафесар Гунтарс Сіеціньш. Сярод выкладчыкаў кафедры вядомыя педагогі: ганаровыя прафесары Айварс Спруджзс, Валдзіс Вілерушс; прафесары Крыстап Гелзіс, Юрыс Петрашкевічс; дацэнты Анатолій Шандураў, Віта Ленэртэ; выкладчыкі Рута Брыедэ, Пауліс Ліепа, Ласма Пуятэ-Стурэ, Сабінэ Векманэ, асістэнт Ганна Звайгзнэ.

На дадзенай выставе прадстаўлена каля 40 графічных твораў 15 студэнтаў і 9 выкладчыкаў кафедры графікі. Гэтыя кампазіцыі выкананы ў розных тэхніках друку, сярод якіх дрэварыт, сухая іголка, глыбокі друк, літаграфія, мецацінта, акватынта, шаўкаграфія.  

Міхась Цыбульскі

кандыдат мастацтвазнаўства, куратар выставы